ഉറുമ്പുകളുടെ ജാഥയും ബഷീറിൻ്റെ പൂവൻപഴവും Urumbukalude Jathayum

ആഗോളവൽക്കരണവും ബഹുരാഷ്ട്ര മുതലാളിത്തവും അതിവേഗം വ്യാപനം ചെയ്യപ്പെടുന്ന പരിതോവസ്ഥകളിൽ അബു ഇരിങ്ങാട്ടിരിയുടെ കഥകൾ പുതിയ മൂല്യബോധങ്ങളെക്കുറിച്ചാകുലമാവുന്നു, കാലത്തിന്റെ സാംസ്കാരിക സവിശേഷതകളെ ഉള്ളിലാവാഹിക്കുന്നു, പല തരം അധീശത്വങ്ങളെക്കുറിച്ചു വേവലാതിപ്പെടുന്നു. ചലനാത്മകമായ ഏതൊരു സാഹിത്യ ജനുസും ചെയ്യുന്നതു പോലെ ഈ കഥകൾ ജീവിതവുമായടുക്കുന്നതിന്,  പല പല അളവുകളിൽ നമ്മുടെയൊക്കെ അനുഭവങ്ങൾ തന്നെയാണെന്ന പ്രതീതി ജനിപ്പിക്കുന്നതിന് കെൽപ്പുള്ളവയാണു താനും. പുറത്തു നിന്നൊരാൾ  ജീവിതത്തെ നിരീക്ഷിച്ച് അതിനെക്കുറിച്ചു പറയുന്നതു പോലെയല്ല, പകരം  വായനക്കാരുടെ ഉള്ളിൽ നിന്നു തന്നെ ഒരു ആഖ്യാതാവ് രൂപപ്പെടുന്നു. ഈ സമാഹാരത്തിലെ പല കഥകളും  വായനക്കാരന്റേതാണ്. ഏറിയും കുറഞ്ഞും  അവൻ/അവൾ അതിലുണ്ട്. അത്രത്തോളം അത് അവരുടേതാകുന്നു. മറ്റൊരു വിധം പറഞ്ഞാൽ ഈ കഥകൾ, അതിനു മാത്രം  സഹജമായൊരു ലാളിത്യത്തോടെ നമ്മുടെയൊക്കെ ജീവിതം തന്നെയാകുന്നു.

ജിസ ജോസ്